MOʻOLELO KANAKA:
Participating Tuahine Troupe Members

Akaka Elia.png

ʻELIA AKAKA

He kama kēia no Kāneʻohe, Koʻolaupoko, Oʻahu i ka laʻi ʻolu o nā pali hiehie Koʻolau. He mamo ia na Kuʻulei De Rego lāua ʻo Hauʻoli Akaka, a na ia mau mākeʻe loina kūpuna i hoʻopaʻa iho ai kona aloha no nā mele a me nā hula o Hawaiʻi nei. ʻO Ke Kula Kiʻekiʻe ʻo Kamehameha ma Kapālama kona wahi i puka aʻe ai i ka makahiki 2018, a eia ʻo ia ke hoʻomau nei i kona hoʻonaʻauao ʻia ʻana ma ke ʻano he haumana laepua o nā kēkelē ʻŌlelo Hawaiʻi a me ka ʻIke Hawaiʻi ma lalo o Hawaiʻinuiākea, a ke ʻimi ʻia nei hoʻi kona Maina ma ka polokalamu Mele o ke Kulanui ma Mānoa. ʻO ke ō mau ʻana o nā ʻike nōhie o kēia paeʻāina aloha ma loko o kēia au hou e holo aʻe nei ka mea e kīpaipai aku iā ia e holomua ma kona ala o ka mālamalama. He lālā nō hoʻi ʻo ia no ka Tuahine Troupe o ka Waihona a Ke Aloha.

Asing Aina.png

ʻĀINA ASING

Ma Kalāwahine a me Papakōlea Oʻahu i hānau ʻia ai ʻo nei kupa o ia mau ʻāina hoʻopulapula pālua i ka laʻi. Ma laila nō i mālama a hānai ʻia ai ʻo ia i nā mele Hawaiʻi ma ka hoʻolohe a hoʻopili ʻana hoʻi i kona ʻohana. Ma ka makahiki 2013 i lei ʻia ai ʻo ia me ka laepua ma ka Hālau ʻŌlelo Hawaiʻi ʻo Kawaihuelani ma ka ʻōlelo Hawaiʻi. Ma Kēkēmapa 2021, e loaʻa mai ana ke kēkelē laeoʻo (MEDEL) iā ia ma Ke Kula Nui ʻO Hawaiʻi Pacific (HPU). ʻO ka ʻike Hawaiʻi kāna e aʻo aku ai i kāna poʻe haumāna ma o nā mele, nā Hula, a me ka ʻōlelo Hawaiʻi nō hoʻi. He mamo ʻo ia no Lei Hulu School of Hula ma lalo o ka malu o Kumu Kimo Alama Keaulana. Me ia ʻo ia i aʻo ai i ka waiwai o ka ʻike kūpuna ma o nā mele, nā hula, a me ka puana ʻana i ka ʻōlelo Hawaiʻi ma ka hīmeni/oli ʻana. He mahalo nō hoʻi kona iā Kumu Keawe Lopes i kona hōʻike ʻana i nā mea he nui ma nā moʻolelo a me nā mele. He lālā nō hoʻi ʻo ʻĀina no ka hui hīmeni ʻo ʻUheʻuhene. ʻAʻole o kana mai kona mahalo iā Iesū no na mea a pau. Nona ke aloha pau ʻole.

Avilez Kekai.png

KEKAIHĀLAʻI AVILEZ

No Honolulu, Kona, Oahu keia haumana puni hele i ka poepoe honua nei. He lala puni mele Hawaii hoi o ia no Kawaihuelani Halau Olelo Hawaii, a he lala pu no ka Tuahine Troupe a me Ka Waihona A Ke Aloha, Ka Papahana Hooheno Mele. Ua loaa maila he elua kekele ia ia i ka Olelo Hawaii; o ka mua he kekele Laepua i ka makahiki 2014, a o ka lua he kekele Laeoo ia i ka makahiki 2016 ma lalo o ka malu o Kumu Keawe Lopes, PhD, ka Luna o ke Komike, me Kumu Kuuipolani Kanahele Wong, PhD, ka Lala o ke Komike. Aoha ona mehameha i kona noho kaawale ana no ka mea ua paa pono ka olelo Makuahine i ka naau, no laila hele pu mau ka olelo o ka aina ma ke ano he hoapili nona i o a i anei. A ma muli o ua oiaio nei e hele pu hoi ai na kupuna me ia nei. Na ka Makua Lani e malama mau mai i loko o ka Haku Iesu Kristo e ola ai.

Bell Jessica.png

PŌHAIKEALOHA BELL

Ma ke kula ʻo ʻEwa i hānau ʻia ai ʻo kēia ʻōiwi o ka ʻāina. I ka makahiki 2017, ua loaʻa mai ke kēkelē laepua ʻIke Hawaiʻi. Ua hoʻi koke mai ʻo ia i ke kula nui e hoʻomau aku i kona aʻo ʻana i ka ʻōlelo Hawaiʻi. Ke uhaiāholo aʻe nei kēia kupa o ke ahe Māunuunu i kāna kēkelē laeoʻo ma Kawaihuelani. Ma o kāna ʻimi noiʻi ʻana i ka ilina mele kaulana no Kohala, ka ʻāina kupuna o kona ʻohana, e hāpai ʻia ana kekahi ala e hoʻohana aku i nā mele maiau a nā kupuna e hōʻala hou ai ka ʻōlelo Hawaiʻi ma ka waha a me ka pepeiao o ka lehulehu mai ka halekula a i ke kauhale. He ʻōlapa nō ʻo ia no ka hālau hula ʻo  Ka Lā ʻŌnohi Mai O Haʻehaʻe ma lalo o ka malu o nā kumu hula Tracie lāua ʻo Keawe Lopes. I kēia mau lā, ke lawelawe nei ʻo ia i nā kumu a me nā haumāna laepua o Kawaihuelani ma ke ʻano he kumu aʻoaʻo.

Damas Frank.png

FRANK DAMAS

ʻO Waiākea, Hilo, Hawaiʻi ka ʻāina hoʻokama o kēia keiki. Aia naʻe ke ewe i ka malu niu haohao ʻono ke moni iho o Pōkaʻī, Waiʻanae, Oʻahualua ka ʻōnohi o nā kai ʻewalu. He ʻimi mau kāna hana i ka ʻike e mau ai ka Hawaiʻi ʻana no kēia mua aku nō. ʻO ke mele, ka hula, a me ka moʻolelo Hawaiʻi ke pūlama mau ʻia, i kahua e paʻa mau ai ka mauli Hawaiʻi. ʻO ka ʻōlelo Hawaiʻi ke hoa i ia mau ʻike a pau, a pēlā pū ke kaula e hauhoa ʻia ai ke aloha ʻohana a paʻa, me kāna wahine, me Kauʻilani, a me kā lāua mau lei kaikamāhine hiʻipoli aloha, ʻo Hāliʻiʻohualaka me Iunia.

Domingo Kala.png

KAHIKINAOKALĀ DOMINGO

Hānau ʻana ʻia i Oʻahu nei ʻo Kahikinaokalā Domingo, i kapa kai o Kaiaka, i ka malu laʻi o nā palikū hāuliuli ʻo Kānehoalani i Kaʻaʻawa, Koʻolauloa. Na Kaʻahuʻula punawai i hānai ʻia maila nei kupa o ka ʻāina, i kolu hoʻi ua hānai ʻana e nā makua aloha ona, ʻo Kealohapumehana lāua ʻo Kalaunuola. Ua puka kula akula ʻo ia mai ka Home Hoʻonaʻauao kaulana i uka o Kaʻiwiʻula i ka makahiki 2017, a ua hoʻomau ʻia ke keʻehi ʻana o ua ala ʻimi naʻauao lā i ke kula nui o Mānoa. He haumāna laepua ʻo Kahikinaokalā i puka me ka B.A. ʻōlelo Hawaiʻi mai ka Hālau ʻŌlelo Hawaiʻi mai ʻo Kawaihuelani.

Fergerstrom Loke.png

LOKELANI FERGERSTROM

Ua hānau ʻia ma Hilo kahi kaulana i ka ua Kanilehua a hānai ʻia hoʻi ma Mānana kahi kaulana i ka Iʻa Hāmau Leo. Ua puka akula ʻo ia ma ka hālau ʻōlelo Hawaiʻi ʻo Kawaihuelani, me ke kēkelē laepua i ka makahiki 2008 a me ke kēkelē laeoʻo i ka makahiki 2019 ma ka ʻōlelo Hawaiʻi. He luna hoʻolaukaʻi no Hālau Kūkalaulama ma ke Kula ʻo Kamehameha. He lālā nō hoʻi ʻo ia no ka Tuahine Troupe o Ka Waihona A Ke Aloha a me ka hui hīmeni ʻo Haʻehaʻe Girls. He haumāna hula ʻo ia na Tracie lāua ʻo Keawe Lopes ma kā lāua hālau hula ʻo Ka Lā ʻŌnohi Mai O Haʻehaʻe. He mahalo nui nō kona no ka luana like ʻana me Kumu Keawe me ia mau mele Hawaiʻi ma o kēia papahana.

Isaac Kalani.png

KALANI ISAAC

‘O wau keia ‘o Kalani, ‘o ia ko’u inoa Hawai’i.  I loko ho’i o ka ‘ohana a ma ke kula koe wale ke kula nui, ‘o Elijah ko’u inoa e hea mau ‘ia.  I ko’u hanau ‘ia ‘ana, o ko‘u inoa hope ‘o ia o Kamaunu a i ka manawa i lawe hanai ‘ia wau, ua ho’ololi ‘ia ko’u inoa hope i Isaac.  I ko’u hele kula ‘ana ma Kamehameha, no’ono’o a’ela wau ua pili no wau i ka ‘ohana Isaac, eia na’e he mo’olelo ‘oko’a ia, ho’ololi ‘ia ka inoa o ko’u Tutu wahine i Sarah Isaac, a ka inoa o kana kane, ka tutukane i hanai mai ia’u ‘o Abraham Isaac kona inoa.  A heluhelu ‘ia ia mau inoa ‘ekolu i loko o ka Baibala, he ‘ohana kaulana a ko’iko’i lakou.  ‘O ka inoa ‘ohana o ku’u Tutu Wahine, ‘o ia ‘o Ka’aihue, a ‘o ka inoa ‘ohana o ko’u Tutu Kane (ka papa o ko’u Mama) ‘o ia ‘o Kalua.  Ka papa o ko’u papa, he Kamaunu ‘o ia, a ‘o kona mama, he Pu‘ou ‘o ia.  Ua ola no ia mau inoa i loko o’u!  I o i ane’i o keia pae’aina, lohe no wau i mau mo‘olelo pili no i ku’u ‘ohana.  A ‘o ka ‘oi paha o ia mau mo’olelo, he mau mo’olelo pili no i ku’u Tutu wahine, ka’u kumu mua i loko o ka hale pule, i ke mele, a i ke ‘ano o ke ola ‘ana.  Eia no wau ke ho’opane’e nei i neia wahi puolo leo i mua o ‘oukou i ke alo o ku’u Mana Lani, ku’u ‘ohana, me ku’u aloha.

Kaiminaauao-Eteuati Sama.png

TAISAMASAMA KAʻIMINAʻAUAO-ETEUATI

He haumāna laepua ʻo Taisamasama na Kawaihuelani Ka Hālau ʻŌlelo Hawaiʻi a me ka Music Department ma Ke Kula Nui O Hawaiʻi Ma Mānoa. Mai Anahola, Koʻolau, Kauaʻi mai ʻo ia. Ke keiki muli loa a Leinaʻala Kaʻiminaʻauao lāua ʻo Matthew Eteuati Sr. Ma Kamehameha Kapālama ʻo ia i aʻo ai i nā ʻano pila hoʻokani like ʻole. Na Kumu Bailey Matsuda mai ka papa Music and Technology a me, ʻAnakē Kalua Tataipu lāua ʻo Kumu Zachary Alakaʻi Lum mai ka hui hīmeni ʻo Concert Glee i hoʻolauna aku iā ia me ia mea he mele a me kona mana lua ʻole e pā ai i ka naʻau o kēlā me kēia poʻe kanaka. Eia nō ʻo ia e hoʻomau nei i kona ala hoʻonaʻauao ma loko nō o nā papa mele like ʻole o ua Kula Nui nei. He limahana wilikī ʻo ia na Keāiwaokulamanu, ke keʻena ʻoki leo o Ka Waihona A Ke Aloha ma lalo o Kumu Keawe Lopes. He lālā nō hoʻi ʻo ia no ka Tuahine Troupe o Ka Waihona A Ke Aloha.

Single -Ka'iu.jpg

KAʻIULANI KANEHAILUA

Ua hānai ʻia nei wahine hoʻoheno mele i ka ʻāina nani e pā aheahe ai ka Malanai. I kēia manawa, ke noho nei ʻo ia i Nānākuli me kona mau mākua, ʻo Charles lāua ʻo Susan Kanehailua, a me kāna mau keiki ʻo Keohookalani lāua ʻo Luaʻehu. Ua puka akula ʻo ia ma ka hālau ʻōlelo Hawaiʻi ʻo Kawaihuelani, me ke kēkelē laepua a me ke kēkelē laeoʻo ma ka ʻōlelo Hawaiʻi. He limahana ʻo ia nei ma Ka Waihona A Ke Aloha, ka papahana hoʻoheno mele o Kawaihuelani. He lālā nō hoʻi ʻo ia no ka Tuahine Troupe o Ka Waihona A Ke Aloha a me ka hui hīmeni ʻo Haʻehaʻe Girls. He haumāna hula ʻo ia na Tracie lāua ʻo Keawe Lopes ma kā lāua hālau hula ʻo Ka Lā ʻŌnohi Mai O Haʻehaʻe. He ʻiʻini kona e lilo ʻo ia i kōkua mau no ia mea he mele Hawaiʻi.

Kono Grant.png

GRANT KONO

Eia hoʻi kēia ʻo Grant A. Kaimana Kono. Ua hānau kēia i Kaleponi a hoʻomaka i ke mele Hawaiʻi ma laila ma muli o ke aloha o kuʻu mākuakane. No Oneawa, Kailua, Koʻolaupoko Oʻahu mai. He lālā haʻaheo nō a ka Tuahine Troupe, he mea hoʻokani me ke hui mele ʻo Ei Nei. Mahalo a mau loa aku e Kumu Keawe a me nā kanaka Kawaihuelani. E ola e Kawaihuelani, e ola ka lāhui, e ola ke mele Hawaiʻi, e ola e ka Tuahine Troupe.

Krug Kamalei.png

KAMALEI KRUG

Ua hānai ʻia ʻo Kamaleikūhaliʻa i ka ʻolu o ke Kaiāulu ma waena o nā māhoe nani hiehie ʻo Māʻiliʻili lāua ʻo Pāheʻeheʻe i Lualualei, Waiʻanae, Oʻahu. ʻO Kamalei ka hiapo a Kalehua lāua ʻo Kihāpai. ʻElua ona pōkiʻi, ʻo Kaʻula kona kaikunāne, a ʻo Lele kona kaikaina. Mai ka wā i hānau ʻia ai ʻo ia, ʻo ka ʻōlelo Hawaiʻi kekahi o nā pouhana o kona ʻohana a he māhele nui ia o kona kahua. Ua puka ʻo ia mai ke Kula Kaiapuni ʻO Ānuenue mai i ka makahiki 2018, a ʻakahi ʻo ia a puka me ke kekelē lae pua ʻōlelo Hawaiʻi. I kēia manawa, e komo ana ʻo ia i ka papahana Hoʻomākaukau Kumu Kaiapuni ma ke kōleke Hoʻonaʻauao o ke kula nui o Hawaiʻi ma Mānoa. Kūlia ʻo ia ma ka lilo ʻana i kumu no ka mea ʻo ka hoʻonaʻauao ʻana i nā hanauna ma hope mai ona kekahi māhele koʻikoʻi loa o ka hoʻōla ʻana i ka ʻōlelo a me ka ʻike Hawaiʻi.

Krug Kaula.png

KAʻULA KRUG

No ka ulu nui kaulana ʻo Pōkaʻī kēia kupuʻeu nei ʻo Kaʻulakauikeaokea. He mamo hoʻi na ke kīhāpai lehua o Lualualei. He kamalei e hiʻikua nei i ka ʻōlelo a me ka ʻike o nā kūpuna. ʻO ka ʻōlelo Hawaiʻi ka ʻōlelo mua a nei kama a hānai ʻia ʻo ia a walewaha i ka ʻōlelo kanaka. Ma ka hīmeni a me ke mele Hawaiʻi kona ʻano o ka hānai ʻia ʻana kekahi. Aia lā ʻo Kaʻula ke kāmoe ala ma ke ala hoʻonaʻauao Hawaiʻi mai ke Kula Kaiapuni ʻO Ānuenue a hiki aku i ke Kulanui o Hawaiʻi ma Mānoa. ʻO ke kaʻi ʻana ma ia ala hāiki a hiki aku i kahi kūlana hoʻonaʻauao kā Kaʻula e kūlia mau ai. Wahi a ua ʻohā nei, aia ma ka ʻōlelo a me ka ʻike o nā kūpuna ke ola o ko Hawaiʻi. Na kākou ka lāhui kanaka e ʻauamo mau i nā kuleana a me nā makana i waiho ʻia e kūpuna mā e mau ai ka loaʻa o kēia kulāiwi e ola ai kākou, ʻo Hawaiʻi nei.

Lopes Nohi.png

KAʻŌNOHI LOPES

He kupa au no Pūʻahuʻula, Kāneʻohe, Koʻolaupoko, Oʻahu i ka ʻolu o nā pali hāuliuli o Nā Koʻolau. He kama au na Kaʻōnohilani lāua ʻo Keawe Lopes a he ʻelua oʻu tita ʻo Piʻikea lāua ʻo Hāweo. He haumāna laepua au na Kawaihuelani o ke Kulanui o Hawaiʻi ma Mānoa. He limahana kākoʻo au o ke keʻena ʻŌlelo Hawaiʻi o Kawaihuelani. He ʻōlapa au no ka hālau ʻo Ka Lā ʻŌnohi Mai o Haʻehaʻe a ua lilo ka hula ʻana i hana hoʻoheno mau ʻia e koʻu ʻohana. Ua hānai ʻia wau ma kekahi home piha i ka ʻŌlelo Hawaiʻi, nā mele Hawaiʻi a me ka hula a pēlā nō i hoʻoikaika ʻia ai ka hoʻoilina o nā kūpuna.

Lopes Pii.png

PIʻIKEA LOPES

‘O Pūʻahuʻula ka ‘aina i ka uluwehi o na pali hauliuli o na koolau. He mamo au na Tracie lāua o Keawe Lopes. He ʻelua oʻu kaikaina, o Kaʻonohi lāua o Hāweo. A ʻo wau nō kēia o Piʻikea Kekīhenelehuawewehiikekauʻōnohi Lopes. Ua hānai ʻia au ma kekahi home i piha i na mele a ua lilo ia mea he mele i mea nui e le‘ale‘a ai ka ʻohana. ‘O ko-u mau makua na kumu hula o ka halau o Ka Lā ʻŌnohi Mai O Haʻehaʻe, a ua lilo nā haʻawina e paʻa nei ma nā mele hula, i kahua no ko mākou ola ‘ana. He limahana au no ke keʻena ʻōlelo Hawaiʻi ma Kawaihuelani. A ua makana ʻia mai ke kekele lae pua ʻōlelo Hawaiʻi iaʻu mai ke kula nui o Hawaiʻi ma Mānoa.

ZacharyLum.png

ZACHARY LUM

No Haʻikū, Heʻeia, Koʻolaupoko, Oʻahu keia kupa ʻo Zachary Alakaʻi Lum. He haumana ʻo ia na ia mea he mele. He pua nō hoʻi ʻo ia na ke Kula o Kamehameha ma Kapālama a he haumana laeʻula ma lalo o ka polokalamu Indigenous Politics ma ke kula nui o Hawaiʻi ma Mānoa. ʻO ke alakaʻi ʻo ia no Kāhuli Leo Leʻa, he papahana 501(c)(3) e ulu ae ai ke aloha ʻāina ma o ke mele. Iā ia ma ke kula ʻo Kamehameha ma Kapālama ma ke ʻano he kumu hīmeni pualu, ʻo ke mele hoʻi ke puana ʻia, ke lohe ʻia hoʻi ke aloha ʻāina o nā haumāna. He 18 ona mau makana Nā Hōkū Hanohano, ma kāna hana he alakaʻi, he puʻukani, a he haku mele hoʻi, ma nā papahana ʻoki leo. He haumāna nō hoʻi ʻo Zachary na Robert ULuwehionāpuaikawēkiuokalani Cazimero, na ka Hālau Nā Kamalei o Līlīlehua. Na ke mele hoʻi e waele i ke ala i hehi ʻia e nā kūpuna o mua, e holomua ai nā kūpuna o hope aku.

Meleisea Maka.png

LEIKULUWAIMAKA MELEISEĀ

No Kānehili, Honouliuli, Oʻahu mai ʻo Saige V. Leikuluwaimaka M. Meleiseā. He kama na Siaosi lāua ʻo Roxanne Leikuluwaimaka Meleiseā, a hānai ʻia ʻo ia e kāna tūtū aloha ʻo Dianne Kawailiʻulā Makaneole. Ma ke kula ʻo Kamehameha āna i hele ai a puka aʻela ʻo ia ma ka makahiki 2017. Ua make nā kekelē laepua iā ia ma ka ʻōlelo Hawaiʻi a me ka ʻike Hawaiʻi ma ke kau kupulau 2021.

Moriguchi Kyle.png

KYLE MORIGUCHI

He haumāna laepua ʻo Kyle Kamalani Moriguchi na Kawaihuelani a me ke kula Kālai ʻĀina o ke Kulanui ʻo Hawaiʻi ma Mānoa. He kupa nō ʻo ia no Kapolei, Honouliuli; he ʻāina kaulana i nā puʻu ʻekolu: ʻo Puʻuokapolei, Puʻupālailai, a me Puʻumakakilo; nā kiaʻi o kona kulāiwi. Na Alika lāua ʻo Phyllis Moriguchi kēia kamalei. Ua puka ʻo ia mai ke kula kiʻekiʻe ʻo Kamehameha ma Kapālama i ka makahiki 2018. I laila i hū aʻe ai ke aloha i ka ʻŌlelo Hawaiʻi, Mele Hawaiʻi, a me nā mea Hawaiʻi a pau i loko ona. He puʻukani ʻo ia a he ʻiʻini kona e hoʻomau ai a e hoʻokaulana hou ai i nā mele Hawaiʻi mai kahiko mai. E puka ana ʻo ia i ke kau Kupulau i ka makahiki 2022 me ʻelua mau kēkelē laepua, kekahi ma ka ʻŌlelo Hawaiʻi, kekahi ma ke Kālai ʻĀina. Ma hope o kona puka ʻana, makemake ʻo ia e holomua i ke Kula Kānāwai ʻo Richardson ma ke Kulanui ʻo Hawaiʻi ma Mānoa.

Nakahara Devin.png

DEVIN NAKAHARA

ʻO Devin Kekuaokalani Nakahara koʻu inoa a he kupa au no Honouliuli ʻEwa. ʻO Nathan koʻu makuakāne, ʻo Shari koʻu makuahine. O kaʻu kumu mua ʻo ʻAnakē Joan Lindsey nāna nō i hoʻokumu i ka ʻiʻini i loko oʻu e aʻo i na hula/mele Hawaiʻi. I kēia manawa he haumāna au na kumu Kaleo Trinidad. Ma muli hoʻi o koʻu aʻo ʻana i nā mele/hula, ua makemake au e aʻo i ka hoʻokani pila ʻana a me ka hīmeni ʻana. Ua hele a nui loa ke aloha no nā mele Hawaiʻi.

Nakahara Dylan.png

DYLAN NAKAHARA

‘O wau nō kēia ʻo Dylan Puʻuwaihaokila Nakahara. He kupa no ka ʻāina ʻo Honouliuli, ʻEwa, Oʻahu mokupuni. ʻO koʻu poe mākua ʻo Nathan lāua o Shari. Puka akula ʻo wau mai ke kula kiʻekiʻe ʻo Kamehameha ma Kapālama i ka makahiki 2020, a he haumana nō kēia ma ke kulanui ʻo Hawaiʻi ma Mānoa, ʻo ka ʻōlelo hawaiʻi ka mekia. He ʻōlapa ʻo wau malalo ka malu o Kaleo Trinidad no Ka Leo o Laka i ka Hikina o ka Lā. Komo akula ʻo wau i ke aʻo ana nā mele hawaiʻi ma ke kula kiʻekiʻe, a ma laila nō i hoʻokumu ʻia ke aloha no nā mele hawaiʻi.

Solatorio Kahanu_edited.jpg

KAHANUOLA SOLATORIO

He kupa ‘o Kahanuola no Kewalo Uka, Papakōlea, Oʻahu. Ua puka ‘o ia me ke kekelē laepua ma ka ‘ōlelo Hawaiʻi a me ka ‘ike Hawaiʻi i ka makahiki 2014 ma Hawaiʻinuiākea a me ke kekelē laeoʻo aʻo i ka makahiki 2017. Ma hope o kona puka ‘ana, ua hoʻi koke ‘o ia i Ke Kula Kiʻekiʻe ‘o Kamehameha ma Kapālama e aʻo ai i ka ‘ōlelo Hawaiʻi. Aʻo pū ‘o ia i ka ‘ōlelo Hawaiʻi ma nā kūlelepaho ma lalo o @ ehoopilimai me kona makuahine e hoʻokuluma ai i ka ‘ōlelo Hawaiʻi ma o ke keleaʻo ‘ana. He lālā hoʻi ‘o ia o ka hui hīmeni mele Hawaiʻi ‘o Keauhou a puni ‘o ia i nā ‘ano mele like ‘ole.

Vaughan-Darval Nohea.png

NOHEA VAUGHAN-DARVAL

He kupa ʻo Nohealeimamo Vaughan-Darval mai ka ʻāina o ka ua Tuahine a me nā ānuenue pālua, ma Mānoa. A aia ʻo ia ke noho nei ma Waimānalo i kēia manawa. Ua puka ʻo ia i ke kēkelē laepua i ka ʻōlelo Hawaiʻi a e hoʻomau ana ʻo ia i ka haumana laeoʻo i ka Hoʻonaʻauoa. He haumana hula ʻo Nohea ma ka hālau ʻo Hālau Hula Ka Lehua Tuahine, ma lalo o kona makuahine, ʻo ia hoʻi ʻo Kumu Kaʻilihiwa Vaughan. ʻO kā Nohea ʻimi noiʻi, ʻo ia hoʻi ka hoʻomau ʻana i nā hana lima noʻeau like ʻole i mālama ʻia ai e kona mau kupuna. E lawe i ke aʻo a mālama, a e ʻoi mau ka naʻauao.

Wong Hoopono.png

HOʻOPONO WONG

He kupa ʻo Hoʻopono Wong no ka ua Poʻolipilipi, ʻoiai, ma ka ua Kīpuʻupuʻu kahi ʻo ia e noho nei. ʻO ka hīmeni a me ke aʻo mele nā mea i pili i kona naʻau. ʻAʻole o kana mai kona mahalo i ka lāhui, mai nā kamaliʻi a i nā kūpuna, nā kumu a i nā haumāna i kōkua aku iā ia ma kēia ala mele!